İstifadə qaydaları

Bu İstifadə qaydaları («Qaydalar») axtar.ai internet platformasının («Platforma») istifadə şərtlərini müəyyən edir. Platforma Azərbaycan Respublikasında fəaliyyət göstərən süni zəka əsaslı elan xidmətidir: istifadəçilər elan yerləşdirə, təbii dildə axtarış apara və Süni zəka köməkçisindən istifadə edə bilərlər.

Platformadan istifadə etməklə — o cümlədən saytı ziyarət etməklə, hesab yaratmaqla, elan yerləşdirməklə, axtarış aparmaqla və ya ödənişli xidmətlərdən yararlanmaqla — siz bu Qaydaların bütün müddəalarını oxuduğunuzu, başa düşdüyünüzü və onlara riayət etməyə razı olduğunuzu təsdiq edirsiniz.

axtar.ai Qaydaları vaxtaşırı yeniləyə bilər. Yenilənmiş redaksiya Platformada dərc olunduğu andan qüvvəyə minir. Dəyişikliklər barədə istifadəçilər Platforma vasitəsilə məlumatlandırıla bilər. Dəyişikliklərdən sonra Platformadan istifadəni davam etdirməyiniz yeni Qaydaları qəbul etdiyiniz mənasını daşıyır.

Platformadan yalnız 18 yaşını tamamlamış fiziki şəxslər və ya qanuni nümayəndəsinin yazılı icazəsi olan yetkinlik yaşına çatmayan şəxslər istifadə edə bilər. Yetkinlik yaşına çatmayan şəxslərin Platformadan istifadəsi yalnız valideyn və ya qanuni nümayəndənin nəzarəti altında həyata keçirilə bilər.

Platforma üzrə ödənişli reklam və abunəlik xidmətləri (elanın irəli çəkilməsi, VIP, Premium və digər paketlər) ayrıca «Oferta» sənədi ilə tənzimlənir. Tam mətn Oferta səhifəsində yerləşdirilir. Ödənişli xidmətlərdən istifadə həm bu Qaydalar, həm də Oferta müddəalarına tabedir.

Platformada hesab e-poçt ünvanı və şifrə, yaxud Google hesabı ilə yaradılır və idarə olunur. Təqdim etdiyiniz e-poçtun sizə məxsus olması və düzgün olması sizin öhdəliyinizdir.

Google hesabı ilə daxil olan istifadəçilər elan yerləşdirmək və kabinet funksiyalarından tam istifadə etmək üçün profilə Azərbaycan mobil telefon nömrəsini əlavə etməlidirlər.

Hesab məlumatlarının (sessiya, şifrə və s.) üçüncü şəxslərlə paylaşılması qadağandır. Hesabınızdan icazəsiz istifadə şübhəsi yaranarsa, dərhal axtar.ai-ə müraciət edin və hesabınızı qorumaq üçün mümkün tədbirləri görün.

Bir istifadəçi adətən bir e-poçt ünvanı ilə bir hesab saxlamalıdır. Saxta, icazəsiz və ya başqasının identifikasiya məlumatları ilə hesab yaratmaq qadağandır.

Profil məlumatlarınızda (ad, e-poçt və digər sahələr) düzgün və aktual məlumat göstərməyiniz tövsiyə olunur. Bəzi funksiyalar — o cümlədən elan yerləşdirmə, qaydaların təsdiqi və ödənişli xidmətlər — hesabın aktiv olmasını tələb edə bilər.

İstifadə qaydalarının qəbul edilməsi serverdə qeyd oluna bilər. Qaydaları oxuyub təsdiqləmək Platformadan tam istifadə üçün tələb oluna bilər; təsdiq tarixi şəxsi kabinetdə göstərilir.

Elan yerləşdirməklə siz elanın məzmununun — başlıq, təsvir, qiymət, foto və digər atributlar daxil olmaqla — doğru, dəqiq, tam və aktual olmasına, habelə Azərbaycan Respublikasının qanunvericiliyinə uyğun olmasına görə məsuliyyət daşıyırsınız.

Bir məhsul, xidmət və ya obyekt üçün eyni vaxtda yalnız bir aktiv elan saxlanıla bilər. Kopyalanmış, dublikat, yanıltıcı və ya bir-birini təkrarlayan elanlar axtar.ai tərəfindən silinə, birləşdirilə və ya dərc olunmamaqda saxlanıla bilər.

Şəxsi əlaqə məlumatlarını (telefon, e-poçt, sosial şəbəkə linki və s.) yalnız Platformanın nəzərdə tutduğu sahələrdə göstərin. Başlıq, əsas təsvir və ya foto üzərində birbaşa əlaqə məlumatı yerləşdirmək qadağandır.

Elanlar texniki minimum tələblərə uyğun olmalıdır: başlıq uzunluğu, təsvir həcmi, əsas şəklin keyfiyyəti və digər format qaydaları. Bu tələblərə cavab verməyən elanlar «Dərc olunmamış» statusunda qala və ya düzəliş üçün geri qaytarıla bilər.

Elan göndərildikdən sonra avtomatik və ya manual yoxlama prosesindən keçə bilər. Yalnız yoxlamadan uğurla keçmiş elanlar ictimai kataloqda «Dərc olunmuş» statusunda göstərilir. Yoxlama zamanı qaydalara uyğun olmayan elanlar rədd edilə, düzəliş tələb oluna və ya silinə bilər.

Dərc olunmuş elanın aktiv qalma müddəti 30 gündür. Müddət bitdikdən sonra elan ictimai görünüşdən çıxır; bərpa qaydaları planınızın limitlərinə və Platformanın cari siyasətinə uyğun tətbiq olunur.

Pulsuz planda hər əsas kateqoriyada eyni vaxtda maksimum 3 aktiv elan yeri mövcuddur. Limit dolu olduqda yeni elan «Dərc olunmamış» statusunda qala bilər; boş yer açılanda və ya ödənişli yerləşdirmə imkanından istifadə edildikdə elan növbəti yoxlama mərhələsinə ötürülə bilər.

Elan tarixinin interfeysdə göstərilməsi vahiddir: bu gün yerləşdirilmiş elanlarda «Bugün» və saat; dünən yerləşdirilmiş elanlarda «Dünən» və saat; 2 gündən sonra isə yalnız təqvim tarixi (məsələn, 24 aprel) — il və vaxt göstərilmir.

Elana düzəliş etmək və ya elanı arxivə göndərmək (geri çəkmək) hüququnuz var. Düzəliş yadda saxlandıqda elan vəziyyətinə görə yenidən yoxlama prosesinə düşə bilər. Arxivə göndərilmiş elan daimi silinmir; müvafiq hallarda bərpa edilə bilər.

Aşağıdakı məzmunun Platformada yerləşdirilməsi, paylaşılması və ya reklam edilməsi qəti qadağandır: qanunvericiliklə qadağan olunmuş mallar və xidmətlər; silah, partlayıcı maddə və onların komponentləri; narkotik və psixotrop maddələr; oğurluq predmetləri; kontrafakt və qanunsuz surət məhsulları; lisenziya və ya icazə tələb edən fəaliyyətlər üçün icazəsiz elanlar.

Təhqiredici, diskriminasiya edici, zorakılığı, nifrəti və ya qanunsuz fəaliyyəti təşviq edən, uşaqların təhlükəsizliyinə zidd olan, intim xarakterli və ya razılıq olmadan paylaşılmış şəxsi məzmun qadağandır.

Spam, avtomatlaşdırılmış toplu elan yerləşdirmə, saxta rəylər, manipulyativ qiymət və ya yanıltıcı reklam, başqa istifadəçilərin şəxsi məlumatlarının icazəsiz toplanması və paylaşılması qadağandır.

Platformanın texniki infrastrukturuna, API-lərinə və ya təhlükəsizlik mexanizmlərinə icazəsiz müdaxilə, zərərli proqram təminatının yayılması, bot və skreper vasitəsilə məlumatların kütləvi çıxarılması qadağandır.

Qaydaların pozulması halında axtar.ai xəbərdarlıq etmədən elanı silmək, elanı dərc etməmək, reklam xidmətini dayandırmaq, hesabı müvəqqəti və ya daimi bloklamaq hüququna malikdir.

Platforma Süni zəka əsaslı axtarış, elan mətninin və atributların təklif edilməsi, şəkil analizi, kateqoriya təyini, mətn təkmilləşdirməsi və moderasiya köməkçisi kimi xidmətlər təqdim edir. Bu xidmətlər istifadəçiyə köməkçi alətlər kimi verilir; onların nəticələri məsləhət xarakterlidir və son qərar istifadəçiyə aiddir.

Süni zəka ilə yaradılan və ya təklif olunan başlıq, təsvir, kateqoriya, brend, model və digər məlumatlar yoxlanılmalı, lazım gələrsə redaktə edilməli və dərc etmədən əvvəl sizin tərəfinizdən təsdiqlənməlidir. Süni zəkanın səhv, natamam və ya uyğun olmayan nəticəsinə əsaslanaraq dərc etdiyiniz elanın hüquqi və faktiki nəticələrinə görə məsuliyyət sizə aiddir.

Süni zəka elan köməkçisi kredit sistemi ilə idarə olunur. Pulsuz planda 30 günlük dövr ərzində 3 hədiyyə elan köməkçisi krediti verilir; ödənişli abunəlik paketləri əlavə kreditlər açır. Elan köməkçisi, mətn təkmilləşdirməsi və şəkil dizaynı funksiyaları ayrı-ayrı kredit pool-ları ilə idarə oluna bilər. Kreditlərin sayı, yenilənmə dövrü və istifadə qaydaları kabinetdə və ödəniş ekranlarında göstərilir. Kredit tükəndikdə müvafiq Süni zəka funksiyalarından istifadə məhdudlaşa bilər.

Süni zəka axtarış sorğunuzu təhlil edərək kateqoriya, marka, qiymət aralığı və digər filtrlər təklif edə bilər. Axtarış nəticələri məlumat bazasındakı elanlara əsaslanır; Platforma hər bir sorğu üçün mükəmməl və ya tam nəticə zəmanət etmir.

Şəkillərin və digər faylların Süni zəka xidmətlərinə ötürülməsi yalnız xidmətin göstərilməsi məqsədilə həyata keçirilir. axtar.ai Süni zəka provayderləri ilə texniki inteqrasiya həyata keçirə bilər; bu halda məlumatların emalı müvafiq müqavilə və təhlükəsizlik tələblərinə uyğun aparılır.

Süni zəka xidmətlərinin müvəqqəti dayanması, gecikməsi, texniki səhvi və ya nəticənin uyğunsuzluğu nəticəsində yaranan birbaşa və ya dolayı zərəərə görə axtar.ai məsuliyyət daşımır, lakin texniki nasazlıqların aradan qaldırılması üçün əlindən gələni edir.

Platforma pulsuz və ödənişli xidmət paketləri təqdim edir. Ödənişli xidmətlərə abunəlik planları (elansız tutum, Süni zəka kreditləri və s.), elanın irəli çəkilməsi («Bump»), VIP, Premium və digər reklam paketləri daxil ola bilər.

Ödənişli xidmətlərin qiymətləri, müddəti və aktivləşmə şərtləri ödəniş anında ekranda göstərilir və Oferta səhifəsində ətraflı izah olunur. Ödəniş manatla (AZN) həyata keçirilir; ödənilmiş xidmətlər üçün geri ödəmə edilmir.

Bonus reklam balansı və onun istifadə qaydaları Ofertada təsvir olunur.

Ödənişli xidmətlər elanınızın kataloqda daha yuxarı mövqe almasını, əlavə görünürlik və ya genişləndirilmiş funksionallıq təmin edə bilər; lakin alqı-satqının baş tutması, elanın satılması və ya müəyyən baxış sayına çatması zəmanət olunmur.

Qaydalara zidd elanlar üçün ödənişli reklam xidməti dayandırıla və ya ləğv edilə bilər. Abunəlik müddəti bitdikdən sonra əlavə verilmiş imtiyazlar avtomatik olaraq ləğv oluna bilər.

Platformadan istifadə zamanı telefon nömrəsi, ad, e-poçt, profil məlumatları, elan məzmunu, yüklənmiş foto və fayllar, axtarış sorğuları, seçdiklərim, mesajlaşma məlumatları, ödəniş tarixçəsi və texniki jurnal məlumatları (IP ünvanı, brauzer tipi, sessiya identifikatoru və s.) toplanıla və emal oluna bilər.

Toplanmış məlumatlar Platformanın işləməsi, hesabın identifikasiyası, elanların dərc edilməsi və moderasiyası, axtarış nəticələrinin göstərilməsi, bildirişlərin göndərilməsi, fırıldaqçılığın qarşısının alınması, qanuni öhdəliklərin yerinə yetirilməsi və xidmət keyfiyyətinin yaxşılaşdırılması məqsədilə istifadə olunur.

Şəxsi məlumatlar qanunvericiliklə nəzərdə tutulmuş hallar istisna olmaqla, istifadəçinin açıq razılığı olmadan üçüncü şəxslərə satılmır. Məlumatlar yalnız qanuni tələb, istifadəçinin açıq razılığı, texniki xidmət göstərən etibarlı tərəfdaşlar (hostinq, ödəniş provayderi, Süni zəka provayderi və s.) və ya istifadəçinin öz elanı vasitəsilə ictimai paylaşım hallarında ötürülə bilər.

Platforma cookie və oxşar texnologiyalardan sessiyanın saxlanması, dil seçimi, tema parametrləri və analitika məqsədilə istifadə edə bilər. Brauzer parametrlərindən cookie idarəetməsini məhdudlaşdıra bilərsiniz; bu, bəzi funksiyaların işləməməsinə səbəb ola bilər.

Siz şəxsi məlumatlarınıza baxmaq, düzəliş etmək, hesabınızı silmək və qanunvericiliyə uyğun olaraq məlumatlarınızın silinməsini tələb etmək hüququna maliksiniz. Belə müraciətlər üçün [email protected] ünvanına yazın.

Platformanın dizaynı, loqosu, proqram kodu, verilənlər bazasının strukturu, interfeys elementləri və «axtar.ai» adı axtar.ai-nin və ya lisenziyaverənin əqli mülkiyyətidir. İcazəsiz surət çıxarmaq, dəyişdirmək, paylamaq və ya kommersiya məqsədilə istifadə etmək qadağandır.

Elan yerləşdirməklə siz axtar.ai-ə elan məzmununun (mətn, foto, video və s.) Platformada göstərilməsi, axtarış nəticələrində indekslənməsi, moderasiya və reklam xidmətlərinin göstərilməsi, habelə qanuni tələb olunduqda saxlanması üçün qeyri-eksklüziv, ödənişsiz, coğrafi məhdudiyyəti olmayan lisenziya verirsiniz.

Yerləşdirdiyiniz məzmunun üçüncü şəxslərin müəlliflik hüququ, ticarət nişanı, şəxsi həyatın məxfiliyi və ya digər hüquqlarını pozmadığına zəmanət verirsiniz. Pozunti iddiası daxil olduqda axtar.ai həmin məzmunu müvəqqəti olaraq çıxara bilər.

Platforma alıcı və satıcı arasında vasitəçi rolunu oynayır. Alqı-satqı, kirayə, xidmət göstərilməsi, ödəniş, çatdırılma, zəmanət və digər hüquqi-müqavilə münasibətləri birbaşa istifadəçilər arasında yaranır. axtar.ai bu münasibətlərin tərəfi deyil və onların icrasına, elanın keyfiyyətinə, satıcının etibarlılığına və ya alqı-satqı nəticəsinə zəmanət vermir.

Platforma «olduğu kimi» («as is») prinsipi ilə təqdim olunur. axtar.ai Platformanın fasiləsiz, səhvsiz, viruslardan azad və ya hər bir istifadəçi ehtiyacına tam uyğun işləməsinə zəmanət vermir.

Qanunvericiliyin icazə verdiyi maksimum həddə axtar.ai birbaşa, dolayı, təsadüfi, xüsusi və ya nəticə etibarilə yaranan zərəərə — o cümlədən mənfəət itkisi, məlumat itkisi, biznes fasiləsi və ya nüfuz zədələnməsinə — görə məsuliyyət daşımır.

Üçüncü şəxslərin Platforma vasitəsilə yerləşdirdiyi elanların, mesajların və ya fəaliyyətlərinin məzmununa görə axtar.ai yalnız qanunvericiliyin tələb etdiyi həddə məsuliyyət daşıyır. İstifadəçi öz fəaliyyəti və elan məzmununa görə tam məsuliyyət daşıyır.

Fırıldaqçılıq, saxta elan və ya qanunsuz fəaliyyət şübhəsi yaranarsa, dərhal axtar.ai-ə məlumat verin və hüquq-mühafizə orqanlarına müraciət etməkdən çəkinməyin.

axtar.ai elanları, profilləri və istifadəçi fəaliyyətini qaydalara uyğunluq baxımından yoxlamaq, avtomatik və ya manual moderasiya aparmaq, qaydalara uyğun olmayan məzmunu dərc etməmək, redaktə tələb etmək və ya silmək hüququna malikdir.

Qaydaların pozulması, digər istifadəçilərin şikayəti, qanuni tələb və ya təhlükəsizlik riski halında axtar.ai xəbərdarlıq etmədən hesabı müvəqqəti dayandıra, funksiyaları məhdudlaşdıra və ya hesabı daimi bağlaya bilər.

İstifadəçi istənilən vaxt hesabını silmək və ya elanlarını geri çəkmək hüququna malikdir. Hesab silindikdən sonra bəzi məlumatlar qanuni saxlama müddətlərinə uyğun olaraq arxivləşdirilə bilər.

Moderator qərarı ilə razılaşmırsınızsa, [email protected] ünvanına əsaslandırılmış müraciət göndərə bilərsiniz. axtar.ai müraciəti nəzərdən keçirir, lakin hər bir hallarda qərarı dəyişdirmək öhdəliyini daşımır.

Bu Qaydalar Azərbaycan Respublikasının qanunvericiliyinə uyğun tərtib edilmiş və şərh olunur.

Qaydalarla bağlı mübahisələr ilk növbədə danışıqlar yolu ilə həll edilməyə çalışılır. Razılıq əldə olunmadıqda mübahisə Azərbaycan Respublikasının məhkəmələrində axtar.ai-nin qeydiyyat ünvanına uyğun yurisdiksiyada baxılır, əgər qanunvericilik başqa qayda nəzərdə tutmursa.

Qaydaların hər hansı müddəasının etibarsız sayılması digər müddəaların qüvvəsinə təsir etmir.

Qaydalar, elan moderasiyası, hesab, ödəniş, məxfilik və texniki dəstək ilə bağlı sual, şikayət və müraciətlər üçün bizimlə əlaqə saxlayın: [email protected]

Müraciətinizdə hesabınızla bağlı telefon nömrəsini, elan identifikatorunu (varsa) və problemin qısa təsvirini qeyd etməyiniz cavab müddətini qısaldır.